सेस गनेस दिनेस महेस सुरेसहु जाके निरंतर ध्यावेँ,
आदि अनादि अनंत अखंड अभेद अछेद सुवेद बतावेँ,
नारद से सुनि व्यास थके, पचि हारि गए तहोँ भेद न पावेँ,
ताहि अहीर की छोहरियाँ छछिया भर छाछ पे नाच नचावेँ.

लाय समाधि रहे ब्रम्हादिक जोगी भये पर अंत न पावेँ,
साँझ ते भोरहिँ भोर ते सांझहि सेस सदा नित नाम जपावैँ,
ढूँढे फिरै तिरलोक में साख सुनारद ले कर बिन बजावैँ,
ताहि अहीर की छोहरियाँ छछिया भर छाछ पे नाच नचावेँ.


गूँज गरे सिर मोरपखा अरु चाल गयंद की मो मन भावै,
साँवरो नंदकुमार सबै ब्रज मंडली में ब्रजराज कहावै,
साज़ समाज सबै सिरताज ओ लाज की बात नहीं कही आवै,
ताहि अहीर की छोहरियाँ छछिया भर छाछ पे नाच नचावेँ.